عشاء قسم كفرعبيدا بحضور النائب سعادة ممثلا رئيس الكتائب

  • كتائبيات

أقام قسم كفرعبيدا عشاءه السنوي بحضور النائب سامر سعادة ممثلا رئيس الحزب النائب سامي الجميل والنائب نديم الجميل والسيدة ليلي جورج سعادة ورئيس اقليم البترون أرز فدعوس ورئيس اقليم جبيل جورج  حداد ورئيس اقليم الكورة فوزي كلش ورئيس مصلحة الانتخابات رالف صهيون ورئيس مصلحة التكريم بول طرزي ورئيس مجلس التكريم جورج روحانا ومنسق التيار الوطني الحر في كفرعبيدا المهندس ميشال خوري ورئيس مركز القوات الاستاذ جان شاهين ورئيس بلدية كفرعبيدا طنوس الفغالي وأعضاء المجلس البلدي ورئيس القسم الرفيق فارس الخوري.

النائب سامر سعادة رحب بالحضور موجها التحية لشبيبة كفرعبيدا ولممثلي الاحزاب مؤكدا ان كفرعبيدا كما دائما تجمعنا.وخص بالترحيب الرفاق في القوات اللبنانية مؤكدا على الاخوة بين الحزبين لان تاريخنا مشترك كما رحب بالنائب نديم الجميل مذكرا بالعلاقة بين كفرعبيدا وبشير الجميل وبين كفرعبيدا وجورج سعادة. كما لفت الى ان هذه البلدة هي قلعة صمود وشبابها وقفوا سدا منيعا بوجه الاغراب واستشهدوا دفاعا عن كل لبنان وكل الناس تعترف ببطولات كفرعبيدا التي تجسد المبادئ التي بني عليها هذا الوطن.

سعادة توقف عند الذكرى التاسعة عشرة لغياب والده الرئيس الاسبق للحزب الدكتور جورج سعادة الذي ترك لنا المبادئ والنضال .كما شن هجوما عنيفا  على وزير الاتصالات جمال الجراح الذي تطاول على ذكرى جورج سعادة.وأكد ان ملف الفساد لن نسكت عنه بعد الان .سعادة تمنى للرئيس الحريري العودة الى لبنان من دون اكمال التسوية المذلة بل من اجل بناء لبنان وعندها نكون الى جانبه.وسأل هل لبنان وسيادته همااليوم بالاقامة الجبرية؟داعيا الى حصر السلاح بيد الدولة و مكافحة الفساد واعادة الدولة الى سكة السيادة والكرامة الوطنية والى تحييد هذا الوطن عن الازمات.وفي الختام تم تكريم عدد من نظاميات القسم الذين سطروا بطولات في الحرب اللبنانية.

كما تحدث رئيس القسم الذي رحب بالحضور قائلا:" لقاءنا الليلة بيأكد إنو بيت الكتائب بكفرعبيدا هوي بيت كل أهالي كفرعبيدا هيدا لقاءنا كعيلة كفرعبيدا الكبيرة تعوّدنا نجتمع ونشتغل لمصلحة ضيعتنا

بيت الكتائب مفتوح للجميع بكل المناسبات والنشاطات بكل أنواعا:الحزبية والاجتماعية والصحية والرياضية والثقافية وغيرها ...بيت الكتائب أمين على تضحيات الشباب ، ووفي تعودنا دايماً ومن أكتر من أربعين سنة نكرم الرفاق الشهدا اللي ضحوا بحياتن للدفاع عن لبنان

بكل اندفاع ونخوة ،ما خافوا ولا تراجعوا ولا اهتموا بمصالحن الشخصية بالعكس لبنان وسيادتو وكرامتو هني الدافع اللي جعلن يقدموا شبابن ونحنا ما نسينا وما مننسى أبداً دماءن الزكية اللي روت تراب الأرز

 

ولأنو الوفا والإخلاص من مبادئنا وأخلاقنا وتراثنا

رح منكرم – بهالليلة- فئة تانية من شبيبة كفرعبيدا

 

هني صبايا بأول شبابن كمان وقفوا وقفة عنفوان بكل فخر واعتزاز نظاميات قسم كفرعبيدا الكتائبي لبسوا البدلة العسكرية تنظّموا وتدرّبوا وشاركوا بالمعارك مع الشباب

لما دق الخطر بلبنان وقالوا للعدو : إيدك عن لبنان

مبروك للنظاميات تكريمن والله يقدرنا نكمل على الدرب اللي رسمتوها درب العز والعنفوان والكرامة.

ومن ثم تحدث رئيس الاقليم الرفيق أرز فدعوس الذي قال بالعامية متوجها الى الحضور:" بتعرفوا انو مظبوط "التاريخ بيعيد نفسوا" صدفة ؟ انو من 74 سنة، بمتل هالليلة ، 18 تشرين تاني 1943كان كمان لبنان محتل، و قرار الدولة كان مخطوف و بمتل هالليلة، عطيت معارضة الاحتلال (و كانت حكومة مؤقتة من وزيرين)، أعطت الضوء الاخضر لبدء المقاومة.و طبعاً الكتائب يللي كان عمرها 9 سنين بهيديك الايام، لبت النداء و نزلت وقادت الارض هي و حزب النجادة و كل الشعب اللبناني و جابو الاستقلال.و صارت الكتائب حزب الاستقلال.

1958 نزلت كمان الكتائب عالطريق تتحافظ على الكيان و تمنع الحاق لبنان باحلاف و محاور عربية من وراء الحدود و صمود التصدي ...التاريخ بيعيد نفسو و "انتصرت الكتايب فانتصر لبنان" "انتصرت الكتايب فانتصر لبنان"...و من ويمتا صرنا حزب الاستقلال و المدافعين عن الكيان بس ما حلو عن .... ضهرنا ، لانو

بال 1974 مدري مين حلم انو يعطي الفلسطيني مفاتيح لبنان كوطن بديل،و يومتها انتو بالذات كفرعبيدا بالذات ، كانت اول مين نزل عالساحة، و انتو كفرعبيدا اول مين قدمت شهدا تمنعت وصول الفلسطينيين لحيفا عبر شكا و عبر جونية بس بصراحا هني ما كان بدن يروحو عحيفا لانوووو هني اصلا كان بدن بعبدااا وبس و شهداءكم يللي منعون يوصلولا!!!و "سمونا انعزالية.

فخلقنا مقاومة لبنانية قوية و جبهة لبنانية قوية و مقاومة لبنانية تتحكي باسم كل الشعب اللبناني مش باسم المسيحيين!بقى منقلن : الله يخليكن بيقدي تعطونا دروس بالمقاومة - هالمدرسة نحنا يللي خلقناها و اهلا و سهلا بيللي بدو ياخذ صف عنا - يتفضل...نحنا يللي دفعنا 6000 شهيد و قدر يومتا بشير و رفاقو يشحط السوري و يحرر بعض المناطق و يحضرها تتكون هي نقطة الانطلاق لتحرير كل لبنان.فشرو يعطونا دروس بالمقاومة

نحنا يللي دفعنا 6000 قديس.يللي استشهد هو عم يتصدى لحرامية الوطن ما هو الا قديس!شباب كفرعبيدا يللي ماتوا تما تنتهك حرمات بيوت شكا و تيوقفوا قتل النسوان و الاولاد عالطرقات و بالبيوت هودي شو بيتسموا؟؟ مش قديسين.يا رفاق :خربوا البلد ، سكروه، عطلوا مصالح الناس و فقروها، تاستلموا السلطة.صادروا الدولة ساوموا عدم شهداء الجيش، و هربوا الارهابيين يللي قتلوا العسكر!!!شفتو!!!! دولة بتبرر وجود دولة ضمن الدولة و بترخص سلاحين!؟؟؟على كل حال مابصح الا الصحيح و صلوا اليو م لانذاراتنا و لحديثنا يلي وصفوا بالشعبوي لانو

عاساس هني بيكتبوا كتب بالسيادة و بالاصلاح و التغيير

عفوا نسيت نسيت نسيت تراجعوا عنن كلن و لموهن من المكتبات نحنا عنا كتاب واحد ما منساه و ما نتراجع عنو و ما منلمو من المكتبات كتابنا عمرو 83 سنة كتابنا كتبو بيار الجميل .بيقول:"تعلمت من صغري على انو متل مالكذب و النفاق و اللعب على الحبال هي سياسة، هالسياسة بتنجح اوقات كتير كمان عشت ببيئة علمتني انو الصدق و الشرف و احترام الغير كمان هي سياسة و هالسياسة بتنجح اكتر من هديك بكتير من شان هيك، دعوة الكتايب ثابتة دايماً:الالتزام بلبنان و بس والحفاظ على سيادتو و بس لا سلطة بديلة عن سلطتو و بس و لا ولاية فيه الا لدولتو و بس و لا سلاح الا سلاح جيشو و بس و يللي ما قبلنا نسلمو بالماضي مش رح نقبل نتنازل عنو اليوم و بس الوضع كتير ديق و دقيق و مستقبل لبنان عالمحك و مستقبل اولادنا بخطر يا بيضل هالبلد لبنان متل ممنعرفوا و بيروح للاحسن( وهيدي وظيفتنا ) او اسموا و هويتو بيتغيروا للابد الابدين.

وفي الختام تم تكريم عدد من نظاميات القسم ووزعت الدروع التقديرية.

المصدر: Kataeb.org