تحت عنوان دور الاعلام اللبناني في المرحلة الراهنة عقد قسم عمشيت لقاء ضم عددا من الاعلاميين بحضور رئيسة بلدية بكفيا المحيدثة السيدة نيكول الجميل وممثل الرئيس ميشال سليمان الاستاذ ظافر سليمان ورئيس الاقليم الرفيق رستم صعيبي ورئيس القسم أنطوان زغيب ونائب رئيس البلدية ناجي خوري وممثلي الاحزاب في البلدة وممثل نادي عمشيت الرياضي الثقافي الاستاذ سمير زغيب.البداية مع النشيدين الوطني والكتائبي فكلمة ترحيبية من الرفيق الاعلامي بيار البايع.

 رئيس القسم الرفيق أنطوان زغيب قال في دوره:"منلتقي اليوم ونحنا ع بواب الصيف لنبشر متل دايما بلبنان يلي منحبو ومنحلم في دايما.صحيح انو الزبالة طمتنا وصحيح انو بالعتمة معيشينا وصحيح انو التلوث خنقنا وصحيح انو الامراض عم تاكلنا ولكن الصحيح ايضا انو روح المقاومة بعدا فينا ومعارك وطنية كتيري ناطرتنا للنظف يلي تلوث ونرد لبنان الاخضر يلي رح يرجع سويسرا الشرق .

لبنان يلي مرق قدامنا بالتقرير هوي بالضبط لبنانا يلي استشهدنا واستشهد غيرنا كرمالو.

لبنان يلي عم نحلم فيه وعم نحلم نورثو لولادنا هو لبنان يلي بتمثلو اليوم طروحات رئيس الكتائب سامي الجميل وبالتحديد لبنان النظيف بيئيا وأخلاقيا البلد يلي ما بتنتهك فيه كل يوم كرامة الانسان بحرق الاعصاب بعجقة السير وعلى ابواب المستشفيات وكل ما مرقنا بين برج حمود والكرنتينا والشويفات.

لبنان يلي بدنا ياه  هو لبنان يلي وضع مداميكو الرئيس كميل شمعون باني الدولة والمؤسسات والشيخ بيار الجميل المدافع الاول عن كرامة الانسان ورياض الصلح عميد الاستقلال والامام موسى الصدر رمز الوحدة والعيش المشترك.

لبنان يلي بدنا ياه هو لبنان عاصي ومنصور وفيروز هيدا الوطن يلي خرطشوا ع ورقة وطبعوا بذاكرتنا مجد وحب وعنفوان ورفض الذل قد ما كان الظلم كبير.

مش رح طول كتير بس بنهي لقول انو دوركن اليوم كاعلاميين هو الاهم انتو يلي عم تصارعوا بمؤسساتكن لتفرقوا  بين الحق والباطل وبين الترهيب والترغيب  وبين الحقيقة يلي عم بتشوفوها واضحة قدامكن والاعتبارات المفروضة عليكن.انما النصيحة اذا كان لا بد من نصيحة هي انو تقولوا الحقيقة قد ما كانت صعبة هالحقيقة تكون متل ما قال بشير امام الجيل يلي سبقكن من الاعلاميين بزيارتو لمبنى تلفزيون لبنان بالحازمية."

أما رئيس الاقليم الرفيق رستم صعيبي شكر رئيس القسم أنطوان زغيب والقسم على النشاط اللافت كما حيا الرئيس الاسبق للاقليم الرفيق روكز زغيب.وقال:" الحقيقة هي ان نتكلم عن الاعلام في كل المراحل لا سيما في المرحلة لان الاعلام سطا على الاثير ودخل حرمات البيوت وبات لاعبا في تغيير التربيات والقناعات وهو غدا السلطة الرابعة ركيزة السلطات.ولقد غدا الاعلام شريك الانسان في العمل .واذا جاز تصنيف الاعلام يصنف بنوعين :الاعلام المرئي والمسموع والمقروء والذي يدار من قبل المؤسسات الاعلامية .والاعلام بواسطة وسائل التواصل الاجتماعي والذي يدار من قبل افراد بدون رقيبا او رقيب.في الاول على اهميته لقد انحرف اعلامنا عن المنحى الثقافي والاجتماعي وغيب التقاليد اللبنانية العريقةواصبح اسير برامج ومسلسلات تنقل من الخارج مع بعض التعديلات لا افادة منها سوى التسلية وضياع الوقت.حتى في نقل الخبرفكل خبر ينقل بطريقة موجهة ترضي ناقله والدليل على ذلك مقدمات نشرات الاخبار في كل المحطات المرئية والمسموعة حيث اصبح لكل طائفة او مذهب شاشة خاصة به.

وتابع:"كلنا متعبون نتوق الى الاسترخاء وغزانا القهر فليكن لنا الاعلام راحة وسعادات يكفينا ما نحن فيه وعليه.ولينقل الاعلام ما يعملق الانسان ويؤنسنه تحت مظلات الرقي والاخاء والتسامح.اما الاعلام الثاني فهو اعلام مفتوح على الخراب .اي خبر في الاعلام الاول يحرره اعلامي ويشرف عليه مدير مسؤول للتأكد من صحته ولنشره بطريقة خالية من الاخطاء.اما الثاني ينشر الفرد اعلانا وكأنه يروي قصة او نكتة مع صديق له بصرف النظر عن صحة الخبر وطريقة نشره."

 

الاعلامية رنا بطرس خوند ألقت كلمة الاعلاميين وقالت:"مسا الخير، رح ابدا بشكر قسم عمشيت الكتائبي اللي جمعنا الليلة لنرجع ناكّد انو نحنا كاعلاميين على الرغم من اختلاف الميادين  منجتمع على مبدء واحد  وهو الدور السامي اللي منلعبوا بايصال الصورة الافضل لبلدنا لبنان

الاعلامي والاعلام بشكل عام  هني اليوم مصدر مهمّ من مصادر التوعية وبناء الفكر المجتمعي وكلنا منتفق عهالنقطة

ووسائل التواصل الاجتماعي  اللي منلعب فيها دور كبير صار الها ايضا تأثير مهم وفعال داخل المجتمعات المعاصرة

ولكن هل اعلامنا اليوم بشكل عام عم يلعب الدور اللي لازم يلعبوا؟

بالقرون الماضية استخدموا السلاح للهيمنة على الشعوب  اليوم عم بتم استخدام الاعلام للاسف للتاثير على الشعوب والمجتمعات والهيمنة على افكارن وتوجهاتن

ما في شك انو وسائلنا الاعلاميية اليوم عم بتواجه تحدي كبير بنقل الحقيقة

 

التضليل صار كبير والمعلومات والاخبار السلبية عم بتتفوق عالاخبار الايجابية  خاصة بموضوع نقل صورة لبنان الحلوة

اخبار خلافاتنا اكثر من تضامناتن مواضيع الفساد عم تتفوق عالانجازاتالصحة البطالة البيئة السياحة  صورة لبنان اللي منفتخر في  كل هالعناوين وغيرها نحنا منختار مسارها اذا كان اعلامنا موحّد لمصلحة لبنان

لقاؤنا اليوم في بيت الكتائب هو لنؤكد  انو اللي بيجمعنا هي وحدها الارزة الخضرا و ال 6 اعمدة اللي بشدنا الها  الحنين عند مطلع كل صيف

واللي بيجمعنا اليوم كمان  هوالفرح اللي مننشره ومنصدّره للعالم من بيبلوس وبيت الدين وصور والارز وجونية واهدن والبترون وكفردبيان...ومن كل لبنان

 

اهلنا اللي سبقونا بالماضي  قاوموا ليبقى لبنان  ونحنا مسؤوليتنا امام تضحياتن انو نكفي النضال كل انسان من موقعوا

كلنا فينا نكون مقاومين ونحنا منملك اقوى سلاح

سلاح الكلمة سلاح المعرفة السلاح اللي بيجمع واللي ما بفرّق سلاح الاعلام

متل ما تسابقوا أهلنا بالماضي الى الجبهات وساحات الشرف نحنا بدورنا لازم نتسابق لا بل نكون السباقين الى كل التظاهرات الثقافية والابداعية والفنية ليبقى وطننا بلد الستة الالاف سنة حضارية هالبلد الصغير اللي ما قدر حدا رغم كل الصعاب والتحديات أنو يهزموا

المناضلين الابطال علّمونا نقول كلمة الحق علمونا نقول الحقيقة قد ما كانت صعبة هالحقيقة

 

ونحنا اليوم لازم نكون اعلاميي الحق والحقيقة  اعلاميي التغيير والتصحيح اعلاميي الامل والصورة الحلوة

اعلاميين ولائنا فقط لهالارض ولهالوطن الحبيب اللي اسمو لبنان واللي ما منرضى عنه بديل.

مرة جديدة بكرر شكري باسمي واسم كل الزملاء لقسم عمشيت الكتائبي اللي جمعنا اليوم من مختلف الاتجهات لانو بيت الكتائب منو فقط بيت للكتائبيينانما بيت لكل اللبنانيين

وخلينا دايما نتذكر  انو ايد بايد  منحقق المستحيل

 

 

السيدة نيكول الجميل تطرقت في كلمتها الى الدور الطليعي الذي يجب ان تأخذه المراة اللبنانية في الحياة العامة في لبنان.شاكرة الاعلاميين على جهودهم في شتى المجالات وعلى اظهارهم الحقيقة كما هي .وفي الختام تحدث كل اعلامي عن رؤيته للاعلام في المرحلة المقبلة وسلمت السيدة الجميل هدية تذكارية لكل الاعلاميين الحاضرين.